Vatan uchun, millat uchun, xalq uchun

Inson hayotining mazmuni va qadri o‘z ildiziga, o‘zligini anglashga chambarchas bog‘liqdir. Har bir insonni tarbiyalashda uch tushuncha alohida ahamiyatga ega: Vatan, millat va xalq. Bu so‘zlar oddiy ibora emas, balki butun milliy g‘ururimizning, kelajakka bo‘lgan ishonchimizning va orzu-intilishlarimizning tayanchidir.

Vatan — muqaddas ona zamin

Vatan inson uchun ona kabi aziz. Qadimiy mutafakkirlarimizdan biri aytganidek: “Vataningni yo‘qotganingda, hamma narsangni yo‘qotgan bo‘lasan.” Vatan bizga hayot, ona tilimiz, tariximiz, qadriyatlarimizni beradi.

O‘z tariximizga nazar tashlasak, ota-bobolarimiz Vatan ozodligi va yurt tinchligi uchun jonlarini fido qilganlar. Jaloliddin Manguberdi, Amir Temur, Zahiriddin Muhammad Bobur kabi buyuk shaxslar yurt obodligi uchun o‘z hayotini baxshida etgan. Ularning shijoati biz uchun ibrat bo‘lishi lozim.

Bugungi kunda Vatanga xizmat qilish — qurol ko‘tarib jang qilish emas, balki ilm olish, mehnat qilish, halol bo‘lish, yurtda obodlik va tinchlikni asrashdir. Har bir o‘quvchi, talaba, ishchi, dehqon, ziyoli — o‘z kasbi orqali Vatani uchun xizmat qiladi.

Millat — o‘zlik va g‘urur manbai

Millat — insonning ildizi, ma’naviyatining mezoni. Tilimiz, urf-odatlarimiz, madaniyatimiz, adabiyotimiz va san’atimiz — barchasi millatning bebaho boyligidir. Millatni sevish — o‘zligini sevishdir.

Agar inson o‘z milliy qadriyatlarini unutsa, u kimligini yo‘qotadi. Shu bois biz yosh avlodni milliy qadriyatlarga hurmat ruhida tarbiyalashimiz zarur. Alisher Navoiy, Abdulla Qodiriy, Cho‘lpon, Fitrat kabi allomalar millat uchun yozgan, millat uchun yashagan, millat uchun kurashganlar. Ularning asarlari bugungi kunda ham bizga ibrat va saboqdir.

Millatning buyukligi — uning birligida. Birlik bo‘lmagan joyda taraqqiyot bo‘lmaydi. Shu bois, yoshlar orasida hamjihatlik, o‘zaro hurmat va mehr-oqibatni kuchaytirish har bir o‘qituvchining, ziyolining vazifasidir.

Xalq — yurtning tayanchi va kuchi

Xalq — davlatning eng katta boyligi. Agar xalq farovon yashasa, davlat ham qudratli bo‘ladi. Xalq uchun xizmat qilish — eng oliyjanob fazilatlardan biridir.

Har bir kasb egasi xalq uchun foydali bo‘lishi mumkin: dehqon mehnati bilan xalqni non bilan ta’minlaydi, shifokor salomatlikni asraydi, o‘qituvchi kelajak avlodni tarbiyalaydi, olim ilm bilan jamiyatni yuksaltiradi. Shuning uchun xalq manfaati yo‘lida mehnat qilish har bir inson uchun sharafdir.

Bugungi kun mas’uliyati:

Mustaqil O‘zbekiston bizga erkinlik, tinchlik va farovonlik berdi. Endi bu yurtni rivojlantirish bizning qo‘limizda. Prezidentimiz ta’kidlaganidek, “Yangi O‘zbekistonni yoshlar bilan birga quramiz.” Bu esa biz — o‘quvchi va talabalardan boshlab, ziyolilar, ilm ahli, barcha fuqaroning mas’uliyatini yanada oshiradi.

Zamonaviy bilim olish, ilm-fan va texnologiyalarga intilish, ona tilini hurmat qilish, milliy qadriyatlarni qadrlash va ulug‘lash, xalq manfaati uchun ishlash — bugungi avlodning eng muhim burchidir.

Demak, Vatan uchun sadoqat, millat uchun g‘urur va xalq uchun fidoyilik — bu bizning hayotiy shiorimiz bo‘lishi shart. Kimki Vatanni sevsa, millatni qadrlasa va xalqni ardoqlasa, u hech qachon yo‘qolmaydi, balki tarix sahifasida abadiy qoladi.

O‘qituvchi sifatida bizning eng asosiy vazifamiz — yoshlarni mana shu ruhda tarbiyalash, ularda vatanparvarlik, millatparvarlik va xalqparvarlik tuyg‘ularini mustahkamlashdir. Chunki kelajakni yuksak cho‘qqilarga olib chiqadigan kuch ham, umid ham, ishonch ham yoshlarning qo‘lidadir.

Xadicahi Kubro ayol-qizlar islom ta‘lim muassasasi o'qituvchisi Joziba Jamol qizi