RAZOAT ORQALI HAROM BO’LADIGANLAR TOIFASI

Razoat lug`atda: Emizish degan ma`noni bildiradi.

Razoat istelohda: Bolani xos vaqtda emizishga razoat deyiladi.

Razoat nasabda harom bo`ladigan toifalarni harom qiladi. Nasabda harom bo`ladiganlarni Alloh taolo Qur’oni karimda zikr qilgan. Ammo razoatda harom bo`ladiganlarning barchasi Qur`oni karimda zikr qilinmagan bo`lsada, lekin Rosululloh sollallohu alayhi vasallamning hadislarida sobit bo`lgan.

Albatta,  nikoh muqaddas aloqadir. Albatta, bu aloqani to`g`ri holatda o`rnatish kerak. Buning uchun esa, uylanmoqchi bo`lgan inson o`ziga most juft tanlamog`i zarur. Tanlash jarayonida e`tibor berish farz bo`lgan shart - xotinlikka tanlayotgan ayolning nikohi, tanlovchi erkakka halol bo`lishi kerak. Islom shariati musulmon erkaklarga ayrim toifa ayollarga uylanishni harom qilgan. Mazkur toifalar ushbu oyatda, bundan oldingi va keyingi oyatlarda va Payg`ambarimiz sollallohu alayhi vasallamning hadislarida bayon qilingan. Bu boradagi ilohiy ta`limot va amrlar shulardan iborat bo`ladi. Islomdan boshqa din va tuzumlarda ham ushbu masalada o`z ta`limotlari hukmlari bor. Ularning ba’zilari islomniki bilan to`g`ri kelsa, ko`plari noto`g`ridir. Ba`zi tuzumlarda Alloh harom qilgan toifadagi ayollarning nikohini halol qilishgan. Hatto,  onasiga uylanishga ham ruxsat berilgan. Boshqa bir tuzumlarda esa, qabilasi boshqa, tanasining rangi boshqa, tabaqasi boshqa yoki shunga o`xshash boshqa shartlar ila ayollarning nikohi harom qilingan. Islom esa, ulkan hikmatlarni e`tiborga olib, nasab aloqasi, emishlik aloqasi va qudachilik aloqasi tufayli ma`lum toifa ayollarning nikohini ma`lum toifa erkaklarga harom qilgan.

Sizlarga onalaringiz, qizlaringiz, opa-singillaringiz, ammalaringiz, xolalaringiz, aka-ukalaringizning qizlari, opa-singillaringizning qizlari, emizgan onalaringiz, emikdosh opa-singillaringiz, xotinlaringizning onalari, o`zingiz qovushgan xotinlaringizning qaramog`ingizdagi qizlari harom qilindi. Agar u (xotin) lar bilan qovushmagan bo`lsangiz, (qizlariga uylanishingizda) gunoh yo`q. Va pushtingizdan bo`lgan og`illaringizning xotinlari, opa-singilni qo`shib olmog`ingiz harom qilindi. Magar avval o`tgan bo`lsa mayli. Albatta, Alloh mag`firat qiluvchi va rahimli Zotdir. (Niso surasi, 23-oyat)

Nasab kimlarni harom qilsa, razoat ham o`shalarni harom qiladi. Emizuvchi ayolning eri tomonidan harom bo`lishligini sababi, albatta u ayolning suti eridandir. Barcha sahobalar, ulamolar nazdida haromlik sobit bo`ladi.

Oisha onamizdan rivoyat qilinadi: “Bir kuni emikdosh bo`lgan amakim kirishlik uchun mendan izn so`radi. Men Rosululloh sollollohu alayhi vasallamdan izn so`ramagunimcha izn berishlikdan bosh tortdim. Shu haqda Rosululloh sollallohu alayhi vasallamdan so`radim. Aytdilarki: “ Albatta u sening amakingdir”, dedilar. Men aytdimki: “Ey Rosululloh, meni ayol kishi emizgan, erkak kishi emas”. Rosululloh sollallohu alayhi vasallam aytdilarki: “Albatta, u sening amakingdir”. Bu voqea hijob oyatidan keyin sodir bo`lgan edi.

Uqba ibn Horisdan rivoyat qilinadi: U Ihoba ibn Azizning qiziga uylandi. Bir xotin kelib aytdiki: “Uqbani ham xotinini ham men emizganman”,  dedi. “Siz xotinimni emizganingizni bilmayman, bu xabarni menga hech kim aytgani ham yo`q”. Shundan so`ng Uqba xotinining otasi Ihobaning uyiga bordi. Va ulardan so`radi. Ular aytdilarki: “Biz ham bilmaymiz”,  dedilar. Shundan so`ng Uqba Madinaga Rosululloh sollallohu alayhi vasallamning yonlariga bordi va u Zotdan so`radilar. Rosululloh sollallohu alayhi vasallam aytdilar:  “Xotin aytadigan gapni aytib bo`libdi. Xotiningdan ajrashgin ey Uqba”. Uqba boshqa xotinga uylandi. Xotini ham boshqa erga tegdi.

Chunki Rosululloh sollallohu alayhi vasallamdan bir kuni emizishlikdagi guvohlik haqida so`raldilar. U zot: “Bitta odila ayol bo’ladi. Ayolga qasam ichirilmaydi. Unga guvoh keltir deyilmaydi. Albatta unga guvoh keltir deyishlik aybdir. Erkak bo`lmagan vaqtda ayolning guvohligi ham kifoya qiladi”,  dedilar.

“Xadichai Kubro” ayol-qizlar islom ta’lim muassasasi 3-kurs talabasi Abduqahhorova Nozima