Ziynatlanish va uning shar’iy chegarasi

Alloh taolo marhamat qiladi: ”Ey, Nabiyning ayollari, viqor bilan uyingizda o’tiring. Ilgarigi johiliyatning ochiq-sochiqligi kabi ochiq-sochiq yurmang. Namozni to’kis ado eting, zakot bering. Allohga va uning Rosuliga itoat qiling. Albatta, Alloh sizdan nopoklikni ketkazib,butunlay poklashni xohlaydi.” Ya’ni ey, Nabiy sallollohu alayhi vassallamning ayollari uylaringizda viqor bilan o’tiring deya zikr qilindi. Bu yerda ayol kishi umuman uydan chiqmasin deyilmayapti, balki zarurat hollardagina chiqib boshqa paytda uyda o’tirishlari afzal ko’rilmoqda. Va yana johiliyatning ochiq-sochiqligi kabi tabarruj qilmasliklari ham aytildi. 

             Johiliyat davrida ya’ni hali islom kirib kelmasidan oldin ayollar ochiq-sochiq kiyinib, yasan-tusan qilib, erkaklarni o’zlariga qaratishga intilishar edi. Alloh taolo esa, bu ishdan qaytardi. Ayol kishi bunday holatda begona erkaklar oldiga chiqib, o’zini ko’z-ko’z qilishi yaxshi emas, chunki buning orqasidan qanchadan-qancha fasod ishlar kelib chiqadi va zinoga olib boradi. O’zlari va o’zgalarni ham gunohkor qilishadi. Mana shu tufayli tinch-farovon oilalarni buzilishiga sabab bo’lishadi. Albatta, bu xarom amaldir. Ammo ayollar o’z mahramlari oldida ziynatlanishga ruxsat berilgan.

               Ayol kishi balog’atga yetgandan keyin avratlarini berkitishi unga farz bo’ladi. Imom Abu Dovud Oisha onamizdan rivoyat qilgan hadisda U zotning oldilariga opalari Asmo binti Abu Bakr yupqa kiyim bilan kirganlarida, u yerda o’tirgan Rosululloh sallollohu alayhi vassallam yuzlarini o’girib olganlar va: 
“Ey, Asmo ayol kishi hayz ko’radigan bo’lgandan keyin undan mana bu va mana bundan boshqa joyi ko’rinmasligi kerak” deb, ikki kaftlari va yuzlariga ishora qilganlari aytilgan.

                Hanafiy mazhabi ulamolari ayol kishiga yuz va kaftlarini ochib yurishga izn berar ekanlar, yuz va qo’lni ziynatlamasdan, tabiiy holda tutishni shart qilib qo’yadilar.

         Johiliyat davrida ayollar oyoqlariga ham turli taqincholar, qo‘ng’iroqlar taqib olishar ekan. Keyin esa, erkaklarning e’tiborini jalb etish uchun oyoqlarini yerga qattiq-qattiq urib yurib, haligi taqinchoqlarning ovozini chiqarishar ekan. Bu esa, o‘z navbatida, erkaklarning shahvatini qo‘zg‘agan, ayolning ortidan tushib xiralik qilishiga va oxir-oqibat zinoga olib borishi mumkin bo‘lgan. Shuning uchun, maxfiy ziynatlarni oshkor etish maqsadida o‘sha ziynatlarning ovozini qasddan chiqarishga harakat qilish ham Islomda taqiqlandi.

                Ayol kishi o‘ziga xos kiyinishi o‘ziga xos go‘zallik kashf etishini ayollarning o‘zlari tushunib yetmoqliklari kerak. Bu haqiqatni ayollar o‘zlariga kelgan, ularning haqiqiy insoniy tabiatlari o‘zligini namoyon qilgan paytda ko‘rish mumkin.

Toʻxtasheva Xadich