Tahorat va unga bog‘liq masalalar

1. Tahoratda to‘rt farz borligiga – qo‘lni yuvish, yuzni yuvish, boshning to‘rtdan biriga mash tortish va oyoqni yuvishning farz ekaniga ahli ilmlar ijmo’ qilganlar .

2. Kimki, boshning hammasiga mash tortsa, farzni mukammal va go‘zal tarzda bajargan bo‘ladi.

3. Og‘izga suv olib yuvish, burunga suv tortib burunni chayishlik, quloqlarga mash qilishlik tahorat amallaridandir.

4. Tahoratda har bir a’zoni yuvish o‘ngdan boshlanishi, soqolga xilol qilish, barmoqlar orasini xilol qilish, misvok ishlatish kabi amallar sunnat ekaniga ahli ilmlar ijmo’ qilganlar.
 

5. Namoz vaqti kirishidan ilgari tahorat olgan kishining tahorati komildir.

6. Har bir namoz uchun yangi tahorat olish mustahabdir.

7. Gʻuslda ham, tahoratda ham suvni isrof qilishdan qaytarilgan.

8. Tahoratda ham, g‘uslda ham ishlatiladigan suvning muayyan belgilangan miqdori yo‘qdir. Har kim poklanishi uchun yetarli miqdorda suv ishlatishi kerak.

9. Tahoratda chap a’zodan boshlab yuvgan kishiga qayta tahorat olish lozim emas.

10. Tahoratda a’zolarni bir martadan yuvgan kishi agar a’zolarini mukammal yuvsa, bir martasi ham tahoratga kifoya qiladi.

11. Tahoratda qo‘llarni tirsaklargacha bo‘lgan qismini yuvishlik farz.[2]↴

12. Tahoratda a’zolarni uch martadan ortiq yuvish zulm (gunoh) dir, magar, nuqsonni to‘ldirish uchun bo‘lgani mustasno.

13. Hayolparishon bo‘lib tahoratsiz o‘qilgan namoz qaytariladi, namozning farzlaridan biron amalni unutishlik uning farzligini soqit qilmaydi.

14. Xaloga kirishda "a’uvzu billahi mina-l-xubsi va-l-xobaais", deyishlik mustahabdir.

15. O‘ng qo‘l bilan istinjo qilish tanzihan makruh.

16. Istinjo qilishda, avval tosh yoki kesak, so‘ngra, suv ishlatishlik afzaldir.

17. Suv bilan istinjo qilish sahobalar ijmo’si bilan sunnatdir.

18. Mukammal tahorat olib, so‘ngra mahsi kiygan kishi keyingi tahorat olishida mahsilariga mash qilishi mumkin.

19. Tahorat oluvchi kishi bir oyog‘ini yuvgach, bir mahsisini kiysa, so‘ngra keyingi oyoqni yuvib ikkinchi mahsisini kiysa, u kishi tahoratlidir.
Tayyorlovchi: Muhammadjonova Ziyoda
Mas’ul: Nozima Ibragimova