Shariat nima?

“Shariat” Islom dini hukmlari to‘plami, Alloh taoloning buyruqlari, qaytariqlari majmuidir.

Avval o‘tgan payg‘ambarlar da’vat qilgan din – Islomning asosi bir xil bo‘lsa-da, ularning shariati, etkazgan hukmlari turlicha edi. Shuning uchun bir payg‘ambar olib kelgan shariat hukmlariga keyin kelgan payg‘ambargacha amal qilingan. Muhammad sollallohu alayhi va sallam oxirgi payg‘ambar bo‘lganlari uchun o‘zlaridan oldingi barcha shariat hukmlari bekor qilingan, butun insoniyat faqat shariati muhammadiyaga amal qilishga buyurilgan.

Islom shariati qiyomatgacha davom etadi.

Bu shariat insonlarning baxtli bo‘lishlarini ta’minlaydi. Unda inson hayotining har bir sohasida, har bir bosqichida uchraydigan kattayu kichik masalalar batafsil bayon etilgan. Islom shariati juda keng qamrovlidir. Unda echimi topilmaydigan masalaning o‘zi yo‘q. Zamonlar o‘tib, ilm-fan rivojlanib, hayot tarzi tubdan o‘zgarishi bilan yangi masalalar paydo bo‘lsa-da, Islom ulamolari ma’lum qonun-qoidalarni ishga solib, barcha savollarga qoniqarli javob qaytarishadi.

Insonlar manfaatini ta’minlash, ularni himoya qilish shariatning asosiy maqsadidir. Lekin bu erdagi manfaatdan inson xohish-istagiga mos manfaat emas, shariat qonunlariga to‘g‘ri keladigan haqiqiy manfaati tushuniladi.

Demak, shariat, shar’iy hukmlar deganda, butun olamlar Parvardigori Alloh taolo buyurgan, qaytargan yoki bandalar qilishlariga rozi bo‘lgan ko‘rsatmalar nazarda tutiladi.

Xadichai Kubro ayol-qizlar o’rta

 maxsus islom ta’lim muassasasi

xodimi M.Saidjalolova