Xavzi Kavsarga iymon keltirish haqligi

Har bir musulmon bandasiga tavhiddan so`ng iymon keltirishi vojib bo`lgan turli masalalar bor. Me`roj va Isro voqeasi, Xavzi Kavsar, shafoat, miysoq va shu kabi haq bo`lgan narsalarga iymon keltirishimiz vojib bo`ladi. 

Alloh Taolo Rasululloh sollallohu alayhi vasallamga xitob qilib:

                                              ”  إنآ أعطينك الكوثر ”

“Albatta, Biz senga Kavsarni berdik”, degan. Imom Termiziy rivoyat qilgan hadisda keltirilishicha, “har bir Payg`ambarning o`z hovuzi bordir. Payg`ambar sollallohu alayhi vasallamning hovuzlari esa eng katta,eng shirin va eng ko`p odam keladigan hovuzdir”, deyilgan.

“Aqiydatut-Taxoviya” asarida: “Alloh Taolo u kishi sollallohu alayhi vasallamga-ummatlarini qutqarish uchun-ikrom qilib bergan hovuz haqdir, xabarlarda rivoyat qilinganidek, Rasululloh sollallohu alayhi vasallam ummatlari uchun saqlab qo’ygan shafoat haqdir”, deb keltirilgan.

“Kavsar” so`zi lug`atda ko`p yaxshilik qilish, juda ham ko`p yaxshilik ma`nolarida keladi. Arablarda esa kavsar so`zi son jihatidan, qadr-qiymat jihatidan,ahamiyati jihatidan ko`p bo`lgan narsaga nisbatan ishlatiladi.

Imom Termiziydan kelgan xasan hadisda Xavzi Kavsar quyidagicha ta`riflangan: “Kavsar- jannatdagi daryo bo`lib, uning ikki qirg`og`i oltindan,o`zani duru yoqutdan, tuprog`i miskdan xushbo`y, suvi asaldan totli, qordan oqdir. Kim undan bir qultum ichsa, keyin abadiy chanqamaydi”. Xavz haqida kelgan juda ko`plab hadislar mutavotir darajasiga yetgan.Ularni 30dan ortiq sahobalar rivoyat qilishgan. 

Nabiy sollallohu alayhi vasallam: “Mening Hovuzimning miqdori Ayladan Yamanning San`osi qadardir. Unda osmondagi yulduzlar sonicha idishlar bordir. Hovuz labiga eng avval boradigan odamlar faqir muhojirlardir”, deganlar. Shunda Umar ibn Xattob:

-Ular kim,ey Allohning Rasuli?-dedilar.

-Ularning sochlari to`zib,kiyimlari kir,changga belangandir. Ular boy-badavlat ayollarga uylanmaganlar. Ularga dunyo eshiklari ochilmaydi,dedilar.

Rasululloh sollallohu alayhi vasallam o`zining hovuzi atrofida ummatlarui ko`p bo`lishini umid qilgan hadislar ham vorid bo`lgan. U Zot shunchalik umid qilibdilarku, biz ummatlar nega Allohning Habibi, Rasuli, payg`ambarimiz Muhammad sollallohu alayhi vasallamning hovuzlarining bo`yiga keluvchilardan bo`lishlikni umid qilmaylik?!

Yerdan hosil olishni umid qilgan har bir dehqon yerni tekislab yumshatadi, unga urug` ekadi, sug`oradi, toki hosil bo`lguncha uni parvarishlaydi, yerdagi balo-ofatlardan omon saqlashi uchun Allohning fazlidan umidvor bo`ladi. Biz ham Alloh Taoloning fazlidan umidvormizki, bizni bu dunyoda hovuz haqida xabardor qilsin va u dunyoda hovuz ne`matining ta`midan totishlik bilan rizqlantirsin.

                                                                        Xadichai Kubro ayol-qizlar o`rta 

                                                                           maxsus islom ta`lim muassasasi

 3-kurs talabasi Sobirova Gulzoda